«Барселона» спорт директори Деку клуб ҳужумчиси Роберт Левандовски билан шартномани узайтириш эҳтимолига оид саволга жавоб берди.

«Биз октябрь ойида шартномаларни узайтириш ҳақида гаплашмаймиз. Ҳаддан ташқари олдинга юришни хоҳламаймиз — барчасини босқичма-босқич амалга оширамиз. Роберт ҳақида гапирадиган бўлсам, у сўнгги йиллардаги энг яхши ҳужумчилардан бири, деб ҳисоблайман. У жуда юқори даражадаги футболчи, энг яхши ўйинчилардан бири. У бизга катта ёрдам берган ва ҳануз ёрдам бермоқда. Ўтган мавсумда у 40 тадан ортиқ гол урди ва "Барса" учун Ла Лигада ҳал қилувчи роль ўйнади.

Ҳозирги ғоя — вазиятни кунма-кун, йилма-йил таҳлил қилиб бориш. Ҳозир шартномаларни узайтириш ҳақида гапириш пайти эмас, балки яқин ҳафталарда спорт формамизни тиклаш учун нима қилиш кераклиги ҳақида фикр юритиш керак», — деган Декунинг сўзларини клуб матбуот хизмати келтирган.

Левандовски 2022 йилдан бери «Барселона» сафида ўйнаб келмоқда. Футболчининг клуб билан амалдаги шартномаси 2026 йилгача мўлжалланган. Ҳозирги вақтда унинг трансфер баҳоси 12 миллион еврога тенг.