Испания терма жамоаси ва Каталониянинг "Барселона" клуби собиқ форварди Давид Вилья "кўк-анорранглилар" сафига трансферини эслади. Битим 2010 йилда амалга ошган эди.

"Аввалига мени лақиллатишяпти, деб ўйладим. Гвардиоланинг шахсан ўзи мен билан боғланганига ишонмадим. Кейин Хавининг рақамини аниқлаб, ўзим Пепга қўнғироқ қилдим. Биз суҳбатлашдик, у мендан ўз жамоасида қандай фойдаланмоқчи эканини тушунтирди. Гвардиола билан суҳбатдан сўнг мен таклифга розилик билан жавоб қайтардим," - дея собиқ ҳужумчининг сўзларини келтиради испан матбуоти.

Давид Каталония грандининг 119 та ўйинида иштирок этган. Ҳужумчи 48 та гол ва 24 та голли узатмани амалга оширган.