"Манчестер Юнайтед"нинг собиқ футболчиси Пол Скоулз дунёнинг бугунги кундаги энг яхши беш нафар ярим ҳимоячисини санаб ўтди.

Рейтингни кутилганидек Педри ("Барселона") бошқарди, уни афсонавий инглиз яқинда ўзининг севимли замонавий футболчиси деб атаганди. Иккинчи ўринга Скоулз яна бир испаниялик - Родри ("Манчестер Сити") ни қўйган бўлса, учликни "ПСЖ"дан португалиялик Витинья якунлаб берди. Тўртинчи ва бешинчи ўринлар аргентиналик Алексис Мак Аллистер ("Ливерпуль") ва нидерландиялик Френки де Йонг ("Барселона") га насиб этди.

Пол Скоулз бутун футболчилик фаолиятини "Манчестер Юнайтед"да ўтказган. Собиқ ярим ҳимоячи 2013 йилда бутсаларини михга илган, унинг ҳисобида "қизил иблислар" сафида 700 дан ортиқ ўйин бор.