Қозоғистон ёшлар терма жамоаси бош мураббийи Денис Мамонов Ўзбекистон ёшлар терма жамоасига қарши ўтказилган икки ўртоқлик ўйинидан сўнг истеъфога чиқишини маълум қилди.

— Тошкентда биз Ўзбекистон жамоасига қарши иккита ўртоқлик ўйини ўтказдик. Шундай имконият пайдо бўлганида, икки учрашувдан иборат форматни танладик, чунки йигитларимизга халқаро тажриба жамғариш зарур эди. Шунингдек, таркиб кенглигини ҳам синаб кўриш ва барча футболчиларга ўйин амалиёти беришни ҳам хоҳладик.

Афсуски, икки учрашув ҳам мағлуб бўлдик. Андоррага қарши аламли мағлубиятдан сўнг мураббийлар штаби бу ўйин футболчилар кайфиятига жиддий таъсир қилганини ҳис этди.

Ўзбекистонга қарши биринчи ўйинда йигитлар Андорра билан бўлган ўйин учун реабилитация қилиниш ва мухлисларни хурсанд этиш учун ижобий натижага эришиш лозимлигини яхши билишарди. Аммо афсуски, ўйин охирида гол ўтказиб юбордик ва 0:1 ҳисобида мағлуб бўлдик.

Иккинчи ўйинда рақибга дастлабки дақиқаларданоқ босим ўтказишга ҳаракат қилдик ва тез гол урдик, аммо учрашув давомида яратилган имкониятлардан фойдалана олмаганимиз сабабли ютқаздик.

Иккинчи ўйиндан кейин кийиниш хонасида жамоага ёшлар терма жамоаси бош мураббийлиги лавозимини тарк этишимни маълум қилдим. Футболчиларга ишга бўлган муносабатлари учун миннатдорчилик билдирдим, уларга Европа чемпионати саралаш босқичида омад тиладим ва жамоа бугунги вазиятни тез орада тузатишини тиладим, — деди Мамонов.