Ўзбекистон Суперлигасининг 25-туридан ўрин олган “Динамо” – “Бухоро” баҳси Самарқанд шаҳрида қизғин муҳитда кечди. Ушбу ўйин “Динамо” учун жуда муҳим аҳамиятга эга эди ва жамоа ўз мухлислари олдида ҳақиқий ирода намойиш этди.

Биринчи бўлимда майдондаги устунликка қарамай, самарқандликлар имкониятлардан фойдалана олишмади. 21-дақиқада меҳмонлар сафидаги Тома Табатадзе ҳисобни очиб, “Бухоро”ни олдинга олиб чиқди. Биринчи тайм 0:1 ҳисобида якунланди ва трибуналарда бироз хавотир сезилди.

Танаффусдан кейин эса “Динамо” тубдан ўзгарган жамоага айланди. 60-дақиқада ёш яримҳимоячи Фирдавс Абдураҳмонов майдон марказидан олдинга сурилиб, чиройли зарба билан ҳисобни тенглаштирди — 1:1. Бу гол жамоага ишонч бағишлади ва шундан сўнг майдонда фақат самарқандликлар ҳукмронлик қилди.

71-дақиқада сербиялик легионер Марко Станоевич жарима зарбасидан аъло даражадаги супергол урди — 2:1! Баҳсни стадионда томоша қилган Фабио Каннаваро ҳам бу голдан сўнг футболчига олқиш йўллагани айтилди.

Шу билан тўхтаб қолмаган “Динамо” 76-дақиқада яна Фирдавс Абдураҳмонов орқали ҳисобни 3:1га етказди. Ёш футболчи бугунги баҳсда дублини расмийлаштирди ва учрашув қаҳрамонига айланди.

Ўйин якунланиши арафасида Анваржондан гўзал гол – ҳақиқий мастер-класс! Ҳисоб 4:1 бўлди ва “Динамо” мухлислари Самарқанд шаҳри кунида байрамона ғалабани нишонлаш имконига эга бўлишди.

Ўзбекистон Суперлигаси. 25-тур
2025 йил 18 октябрь, шанба. Самарқанд, “Динамо” стадиони.
"Динамо" – "Бухоро" — 4:1 (0:1)
Голлар: 0:1 — Тома Табатадзе (21'), 1:1 — Фирдавс Абдураҳмонов (60'), 2:1 — Марко Станоевич (71'), 3:1 — Фирдавс Абдураҳмонов (76'), 4:1 — Анваржон (90')
Огоҳлантириш: Муҳаммад Йўлдошев (“Бухоро”, 62')
Бош ҳакам: Равшан Абдувоҳидов
Ёрдамчи ҳакамлар: Руслан Серазитдинов, Бахтиёрхўжа Шавкатов,
Захира ҳакам: Азиз Жуманов,
Назоратчи: Бахтиёр Намозов,
VAR: Найим Қосимов,
AVAR: Эдита Мирободова
Комиссар: Ойбек Давлетмуродов