Боливияга расмий ташриф билан келган ФИФА президенти Жанни Инфантино ушбу мамлакатда футбол бўйича жаҳон чемпионати ўтказилишига рухсат берди. Бу ҳақда TyC Sports хабар бермоқда.
Инфантино Боливия футбол федерациясининг турли терма жамоаларни қабул қилиши мумкин бўлган биринчи спорт мажмуаси Casa de la Verde очилиш маросимида иштирок этди.
"Жаҳон чемпионатини албатта бу ерга олиб келамиз. Албатта, қандай бўлишини кўрамиз, аммо бу ерда қурилаётган инфратузилма, бу мамлакатда футболга бўлган иштиёқ билан биз уни қўллаб-қувватлашимиз керак", - деди Инфантино.
Инфантинонинг нутқида ва унга ҳамроҳлик қилган амалдорларнинг сўзларида маҳаллий футболнинг асосий муаммоси ҳақида бир оғиз ҳам сўз айтилмади. Йирик турнирларни ўтказиш учун озми-кўпми яроқли бўлган Боливиядаги барча стадионлар кислород етишмайдиган баланд тоғларда жойлашган.
