ФИФА президенти Жанни Инфантино жаҳон чемпионатларидан бирини Боливияда ўтказишни хоҳлашини маълум қилди. Бу ҳақда у турли ёш тоифалари терма жамоалари учун мўлжалланган маҳаллий футбол федерациясининг янги машғулот базаси очилиши маросимида айтди. Боливия баланд тоғли ҳудудда жойлашгани сабабли, кўплаб терма жамоалар бу ерда ўйнаганда қийинчиликка дуч келади.
«Биз, албатта, бу ерда жаҳон чемпионатини ўтказамиз. Қайси жаҳон чемпионати эканини кейин кўрамиз, аммо бу ерда яратилаётган инфратузилма ва мамлакатнинг футболга бўлган иштиёқини ҳисобга олсак, бу ғояни қўллаб-қувватлашда давом этишимиз керак», — деди Инфантино ABC нашрига берган интервьюсида.
Эслатиб ўтамиз, кейинги жаҳон чемпионати 2026 йилда АҚШ, Мексика ва Канадада ўтказилади. 2030 йилги мундиал олти давлатда, 2034 йилги мусобақа эса Саудия Арабистонида бўлиб ўтади.













