Мадриднинг "Реал" клуби дарвозабони Тибо Куртуа жамоанинг "Барселона"га қарши ўйинлардаги омадсизликларига чек қўйишга умид қилмоқда.
Ўтган мавсумда "қаймоқранглилар" тўртта "эл-класико"нинг барчасини ютқазишди. Улардан биринчисида ўша пайтда Карло Анчелотти мураббийлигидаги жамоа "Сантьяго Бернабеу"да 0:4 ҳисобида имкониятни бой берганди.
"Ўтган мавсумда ғалаба қозона олишимизга ишонгандик ва имкониятларимиз бор эди, аммо 0:4 ҳисобида ютқаздик. Биринчи бўлимда ҳаммаси бошқача бўлиши мумкин эди - бундай майда-чуйда деталлар бундай даражадаги ўйинлар тақдирини ҳал қилади, айниқса "Барса" билан," - деди Куртуа Чемпионлар лигасида "Ювентус" устидан қозонилган ғалабадан кейин берган интервьюсида.
