"Барселона" жамоа бош мураббийи Ханс-Дитер Фликнинг "Реал"га қарши Испания чемпионати ўйини учун дисквалификацияси бекор қилинишига эришмоқчи. Mundo Deportivo нашрининг хабар беришича, пайшанба куни "кўк-анорранглилар" Апелляция қўмитасига апелляция шикояти билан мурожаат қилишган.
Эслатиб ўтамиз, Флик дам олиш кунлари "Жирона"га қарши баҳсда қизил карточка олганди. Немис иккинчи огоҳлантиришдан кейин майдондан четлатилди. Арбитр мураббийнинг ҳаракатларида қарорга норозиликни кўрди.
"Барселона" апелляциясида айтилишича, ҳакамнинг протоколдаги ёзувлари видеода кўриш мумкин бўлган нарсаларга мос келмайди. Аввалроқ Интизом қўмитаси каталонияликларнинг далилларини қабул қилмаган ва Фликни дисквалификация қилганди. Агар бу шикоят ҳам қаноатлантирилмаса, унда "Барселона" Испания маъмурий спорт трибуналига мурожаат қилиши мумкин.
"Реал" - "Барселона" учрашуви 26 октябрь, якшанба куни бўлиб ўтади.
