"Наполи" ярим ҳимоячиси Кевин де Брюйне "Интер" дарвозасига пенальтидан тепаётган вақтда жиддий жароҳат олди. Бельгиялик футболчи шифокорлар ёрдамида майдонни тарк этди. Неаполь клубининг расмий сайтида душанба куни де Брюйненинг ҳолати ҳақида баёнот берилди.
"Наполи"нинг маълум қилишича, текширувда де Брюйненинг ўнг сонининг икки бошли мушаги жиддий ёрилгани аниқланган. Кевин аллақачон реабилитация дастурини бошлаган. 34 ёшли футболчининг тикланиш муддати маълум қилинмаган.
Эслатиб ўтамиз, "Наполи" "Интер"ни 3:1 ҳисобида мағлуб этди. Антонио Конте жамоаси қўшимча кўрсаткичлар бўйича "Рома"ни ортда қолдириб, А Серияда пешқадамлик қилмоқда.
