Душанба куни "Ювентус" матбуот хизмати Игор Тудор бош мураббийликдан истеъфога чиқарилганини эълон қилди. Журналист Жанлука ди Марционинг маълум қилишича, хорватиялик мутахассис ўрнига асосий номзод Лучано Спаллетти бўлиб турибди.
Маълум бўлишича, тез орада "Ювентус" раҳбарияти италиялик мутахассис билан музокараларда фаоллашади. Ҳозирча бош мураббий вазифасини Массимо Брамбилла бажариб туради.
Спаллеттининг сўнгги иш жойи Италия терма жамоаси бўлиб, у шу йилнинг июнь ойида у ерни тарк этган. Бунгача 66 ёшли мураббий "Наполи", "Интер", "Рома" ва бошқа клубларни бошқарган.
"Ювентус" 12 очко билан А Серия 8-поғонасида бормоқда. Туринликлар кетма-кет саккизта ўйиндан бери ғалаба қозона олмаяпти.
