Мадриднинг "Реал" клуби марказий ҳимоячиси Дин Хёйсен Винисиус Жуниор билан боғлиқ вазият ҳақида фикр билдирди.
Эслатиб ўтамиз, Ла Лига доирасидаги "Барселона"га қарши ўйинда бразилиялик футболчи захирага олинди ва майдонни тарк этаётганда бош мураббий Хаби Алонсо билан қўл бериб кўришмади. Кейинроқ маълум бўлишича, ҳужумчи жамоа ва мураббийдан узр сўраган.
"Матбуотда кўп миш-мишлар ёзилади, сиз эса майда-чуйдалардан бутун бир воқеани бўрттириб юбордингиз. У кечирим сўради ва менимча, ҳаммаси адолатли. Футболда бундай ҳолатлар бўлиб туради," - деди ҳимоячи "Ливерпуль"га қарши ўйин олдидан ўтказилган матбуот анжуманида.
