«Барселона» ҳужумчиси Ламин Ямал Чемпионлар лигаси умумий босқичининг 4-турида «Брюгге» (3:3) жамоасига қарши ўйиндан сўнг соғлиги ҳақидаги хабарларга изоҳ берди.

«Менинг оёғимнинг сон қисмидаги жароҳатим ва гўёки хафсалам пир бўлгани ҳақида кўп гапиришди. Бунинг ҳаммаси ёлғон. Мен фақат яна машғулотларга қайтишга ва ўз даражамда ўйнашга ҳаракат қилдим — айнан шунда ўзимни яхши ҳис қиламан ва завқ оламан», — деди Ламин Ямал Marca нашрига берган интервьюсида.

Аввалроқ Ямал оёғидаги жароҳати туфайли азият чекаётгани хабар қилинган эди. Шунингдек, бу жароҳат футболчи учун сурункали тус олиши мумкинлиги қайд этилган.

Жорий мавсумда Ламин Ямал барча мусобақаларда 10 та ўйинда майдонга тушиб, 5 та гол урди ва 5 та голли узатма берди.