Ламин Ямал чов соҳасидаги муаммолар туфайли даволанишга муҳтож бўлгани учун Испания терма жамоаси қайдномасидан четлатилди. Федерация ва терма жамоа "Барселона" Ямалнинг даволаниши ҳақида ўз вақтида хабар бермаганидан норози бўлди. Каталония клуби раҳбари Жоан Лапорта ушбу эътирозларга жавоб қайтарди.

"Ямални кўрикдан ўтказган шифокор хулосасини олганимизда федерацияга хабар бердик. Шифокорларимиз маълумотни дарҳол федерация шифокорларига етказишди. Биз ҳеч қандай тортишувни хоҳламаймиз.

Мутахассис душанба куни келди, ташхис қўйди, даволанишни буюрди. "Барселона" Ямалнинг энг яхши формада бўлишини истамоқда. Бу терма жамоа ўйинлари вақтига тўғри келди, аммо жамоа шундоқ ҳам Ямалсиз ҳам саралашда ишончли ҳаракат қилмоқда," - деди Лапорта Catalunya Radio нашрига.

"Барселона" Ла Лига турнир жадвалида 2-ўринни эгаллаб турибди.