Португалия терма жамоаси ярим ҳимоячиси Бруну Фернандеш жамоанинг амбициялари ҳақида гапирди.
Якшанба куни португаллар ЖЧ-2026 саралашининг сўнгги турида Арманистон билан тўқнаш келишади. Ғалаба Роберто Мартинес жамоасига тўғридан-тўғри мундиал йўлланмасини кафолатлайди.
"Португалиянинг мақсади - ғалаба. Бу шароитга қараб ўзгармайди. Биз ким билан ўйнашимиздан қатъи назар, ғалаба қозонишни хоҳлаймиз - хоҳ дунёнинг биринчи жамоаси билан, хоҳ 50-жамоаси билан. Жаҳон чемпионатида ғолиб бўлиш истагимизга ҳеч нарса таъсир қилмайди. Биз ҳеч қачон орзумиз жаҳон кубогини бошимиз узра кўтариш эканини яширмаганмиз," - деди "Манчестер Юнайтед" сардори матбуот анжуманида.
