Саудия Арабистони Ривожланиш жамғармаси ва ФИФА ривожланаётган мамлакатларда спорт инфратузилмасига молиявий кўмак бериш учун кучларни бирлаштирмоқда, дея хабар тарқатди ФИФА матбуот хизмати.

«Ривожланаётган мамлакатлар ва уларнинг ФИФАга аъзо-ассоциацияларини қўллаб-қувватлаш бўйича англашув меморандуми имзоланди.

Саудия Ривожланиш Жамғармаси (SFD) томонидан ФИФА талабларига жавоб берадиган стадионлар ва уларга туташ инфратузилмаларни барпо этиш ёки яхшилаш учун имтиёзли кредитлар шаклида 1 миллиард АҚШ долларигача маблағ ажратилади.

Ҳамкорлик ижтимоий интеграцияни кучайтириш, ёшлар имкониятларини кенгайтириш ва спорт орқали иқтисодий имкониятлар яратиш орқали барқарор ривожланишга кўмаклашишни мақсад қилади.

Ушбу имтиёзли кредитлар ёрдамида SFD ва ФИФА миллий ҳокимият тузилмалари билан яқин ҳамкорликда ишлаб, узоқ муддатли иқтисодий барқарорликка хизмат қилувчи ва маҳаллий салоҳиятни ривожлантирадиган лойиҳаларни амалга оширади. Бундан ташқари, ташаббус ривожланиш институтлари, хусусий сектор ҳамкорлари ва минтақавий ташкилотларни жалб қилиш учун старт салоҳиятини яратади. Бу ривожланаётган иқтисодиётга эга давлатларда спортни барқарор ривожлантириш бўйича кенгайтирилиши мумкин бўлган модел сифатида фойда беради», — дейилади ФИФАнинг расмий сайтида.

Таъкидлаш жоизки, ФИФА ўзининг «FIFA Forward» ривожлантириш дастури орқали айнан «ривожланаётган футбол мамлакатлари»га молиявий кўмак кўрсатиб келади. Ушбу рўйхатга, жумладан, Ўзбекистон ва Қозоғистон ҳам кирган.