"Ди-Си Юнайтед" ҳужумчиси Кристиан Бентеке Бельгия чемпионатига қайтиш ҳақида ўйламоқда. "Ливерпуль" ва "Кристал Пэлас" клубларининг собиқ ҳужумчиси АҚШ, Канада ва Мексикада бўлиб ўтадиган жаҳон чемпионатида ўйнаш учун Бельгия терма жамоаси бош мураббийи Руди Гарсия эътиборини тортмоқчи. Бу ҳақда журналист Саша Тавольери ўзининг Х ижтимоий тармоғидаги аккаунтида маълум қилди.
Инсайдернинг маълум қилишича, футболчини "Андерлехт" ва "Брюгге" клублари кузатиб бормоқда.
Бентеке 2022 йилдан бери МЛСда ўйнамоқда. 2024 йилда у мавсум якунлари бўйича лиганинг рамзий терма жамоасига кирди. Жорий йилда 35 ёшли форвард АҚШ чемпионатида 25 та ўйинда 9 та гол урди ва 3 та голли узатмани амалга оширди.













