Мадриднинг "Реал" клуби ҳимоячиси Трент Александр-Арнольд Испания чемпионатининг 19-туридан ўрин олган "Атлетик" Бильбаога қарши ўйинда (3:0) олган жароҳати ҳақида гапирди.
Англиялик футболчи 55-дақиқада захирага олинди. Кейинроқ маълум бўлишича, фуллбэк чап сонининг тўрт бошли мушаги соҳасидан жароҳат олган ва икки ой давомида майдонга туша олмайди.
«Вазият оғриқли, лекин кучлироқ ва яхшироқ қайтиш учун астойдил ҳаракат қиламан! 2026 йилда кўришгунча, мадридликлар», - деб ёзди Трент ўзининг ижтимоий тармоқдаги саҳифасида.
Умуман олганда, Ла Лиганинг жорий мавсумида ҳимоячи саккизта ўйинда майдонга тушди ва битта голли узатмани амалга оширди. Шунингдек, унинг ҳисобида Чемпионлар Лигасида учта ўйин бор.
