"Арсенал"нинг бразилиялик вингери Габриэль Мартинелли "канонирлар" собиқ ҳужумчиси Тьерри Анрининг еврокубоклардаги рекордини такрорлаш арафасида турибди, деб ёзади Opta Х ижтимоий тармоғида.
Ҳозирда Габриэлнинг ҳисобида Чемпионлар лигасида кетма-кет бешта ўйинда гол бор, Анри еврокубок учрашувларида кетма-кет олтита ўйинда гол урган. Бразилиялик футболчи EЧЛ умумий босқич 6-туридан ўрин олган "Брюгге"га қарши ўйинда (3:0) рақиб дарвозасига йўл топди.
Мартинелли 24 ёшда, у 2019 йилдан бери "Арсенал"да ўйнаб келмоқда. Ҳужум чизиғининг универсал футболчиси жорий мавсум клуб миқёсида 17 та ўйинда майдонга тушиб, 6 та гол урди ва 1 та голли узатмани амалга оширди.
Эътиборлиси, Габриэлнинг 6 та голидан фақат биттаси АПЛ доирасида киритилди.
