Сешанба куни ФИФА талқини бўйича йилнинг энг яхши футболчилари ва мураббийларига мукофотлар топширилди. Ғолиблар терма жамоа сардорлари ва бош мураббийлари ўртасида овоз бериш йўли билан аниқланди.

Мадриднинг "Реал" клуби аъзоси австриялик Давид Алаба кутилганидек ўз футболчилари рейтингида биринчи ўринни жамоадоши Килиан Мбаппега берди, иккинчи ва учинчи поғоналардан эса "ПСЖ" аъзолари Ашраф Ҳакимий ва Усмон Дембеле жой олди. Энг яхши мураббийга овоз берган ҳимоячи биринчи ўринни Арне Слотга ("Ливерпуль"), иккинчи ўринни Микел Артетага ("Арсенал"), учинчи ўринни Роберто Мартинесга (Португалия терма жамоаси) берди. Дарвозабонлар рўйхатида ҳам сюрпризлар йўқ: жамоадоши Тибо Куртуа биринчи, Мануэль Нойер ("Бавария") иккинчи, Жанлуижи Доннарумма ("Манчестер Сити," аввалроқ - "ПСЖ") учинчи бўлди.

Йилнинг энг яхши футболчиси соврини Усмон Дембелега насиб этган бўлса, мураббийлик ва дарвозабонлик номинацияларида Луис Энрике ва Жанлуижи Доннарумма ғолибликни қўлга киритди.