"Манчестер Юнайтед" душанба куни "Борнмут" билан 4:4 ҳисобида дуранг ўйнади. Ҳимоячи Нуссайр Мазрауи "қизил иблислар" сафида майдонга тушмади. Гап шундаки, ФИФА клубларга Африка Миллатлар Кубогида иштирок этадиган терма жамоаларга футболчиларни жамоанинг турнирдаги биринчи ўйинига етти кун қолганда қўйиб юбориш мажбуриятини юклаган.
Агар "МЮ" шанба куни ўйнаганида, Мазрауига майдон тушиш имконияти бўларди, бироқ телевидение манфаатларини кўзлаб ўйин душанба кунига белгиланди. "Қизил иблислар" жамоаси ўзларининг айби бўлмаган ҳолда жабр кўрганликларини таъкидлашди. Марокаш томони Мазрауига "МЮ" сафида ўйнашга рухсат бермагандан сўнг, клуб ФИФАга шикоят билан мурожаат қилди. Бироқ, ESPN хабар беришича, ФИФА бу масалада Марокаш томонини қўллаб-қувватлади.
