"Эвертон" клуби ва Украина терма жамоаси асосий ҳимоячиси Виталий Миколенко фаолиятини Германияда давом эттириши мумкин.
Британиянинг ТЕАМталк нашри манбаларига кўра, "РБ Лейпциг" ва "Айнтрахт" вакиллари Миколенконинг "ирислар" билан амалдаги шартномаси 2026 йил июнь ойи охирида якунланишини инобатга олиб, уни келаси ёзда эркин агент сифатида ўз сафига қўшиб олмоқчи.
Қайд этилишича, "Эвертон" Миколенкони жамоада сақлаб қолмоқчи, чунки у асосий таркибнинг доимий ўйинчиси ҳисобланади, бироқ ҳозирда клуб раҳбарияти ва футболчининг вакиллари ўртасида келишув йўқ. Украиналик футболчи 2026 йилнинг январь ойидан бошлаб бошқа исталган клуб билан трансфер бўйича музокараларни бошлаши мумкин.
Жорий мавсумда 26 ёшли Миколенко "Эвертон" сафида барча мусобақаларда 15 та ўйинда майдонга тушди. Инглиз клуби сафида жами 137 та ўйинда 4 та гол ва 3 та голли узатмага муаллифлик қилган.
