Англиянинг "Ливерпуль" клуби венгриялик ярим ҳимоячи Доминик Собослаи билан янги шартнома бўйича музокараларни бошлади. Клуб бир неча етакчи клублар эътиборига тушган 25 ёшли футболчини ўз сафида олиб қолмоқчи. Бу ҳақда Indykaila Х ижтимоий тармоғида хабар берди.
"Ливерпуль" асосий футболчисини йўқотишининг олдини олиш учун яхшиланган шартлар асосида узоқ муддатли шартнома таклиф қилмоқчи. Собослаи клубда қолишга тайёрлигини билдирди, аммо янги шартнома унинг ҳозирги шартномасидан анча фойдали бўлиши кераклигини таъкидлади.
Жорий мавсумда Собослаи "Ливерпуль" сафида 23 та ўйинда майдонга тушди ва 5 та гол ҳамда 4 та голли узатмага муаллифлик қилди. Унинг клуб билан амалдаги шартномаси 2028 йилга қадар имзоланган. Transfermarkt талқинига кўра, футболчининг нархи 85 млн еврони ташкил қилади.
