Франция терма жамоаси ва “Арсенал”нинг собиқ футболчиси Тьерри Анри 18 декабрь куни фаолияти давомида эришган ютуқлари учун бериладиган Lifetime Achievement мукофоти билан тақдирланди. Тақдирлаш маросими BBC телеканали томонидан ташкил этилди.

Мукофотни қабул қилиб олар экан, Анри аввало собиқ жамоадошлари ва мураббийларига миннатдорлик билдирди. Шунингдек, у фарзандларига — Тее, Тристан, Татиана ва Габига мурожаат қилди. Айнан улар Анрига ушбу мукофотни топширишди.

“Энг катта қўрқувим — ёмон ота бўлиб қолиш. Мен ҳар доим ҳам яхши ота бўлмаганман. Бу мукофот меники эмас, сизники. Сиз мени тарбиялаяпсиз, жароҳатларимдан асрайсиз, инсон бўлиш — заиф, аммо меҳрибон ва ҳамдард бўлиш нимани англатишини кўрсатяпсиз. Шунинг учун менга меҳрибон бўлганингиз ва борлигингиз учун раҳмат”, деди Анри.

BBC раҳбарияти Анрининг замонавий футболчи тушунчасини қайта талқин қилганини, шунингдек, унинг майдондаги истеъдоди, футбол тафаккури ва футбол ривожига қўшган ҳиссасини алоҳида эътироф этди.

“Футбол менга ҳамма нарсани берди ва мен унга боримни бағишладим. Ушбу мукофот орқали футбол тарихида эътироф этилиш, мухлислар ва жамоадошлар қалбида из қолдириш — бу мен ҳеч қачон унутмайдиган лаҳза”, дейди собиқ футболчи.

Тьерри Анри ўз даврида дунёнинг энг яхши футболчиларидан бири бўлган. Жаҳон ва Европа чемпиони, УЕФА Чемпионлар Лигаси ғолиби, шунингдек Франция, Англия ва Испания чемпионатлари ғолиби ҳамда Конфедерациялар кубоги соҳиби ҳисобланади.

Фаолияти давомида ҳужумчи ва қанот ярим ҳимоячиси позицияларида тўп тепган. У “Монако”, “Ювентус”, “Арсенал”, “Барселона” ва “Нью-Йорк Ред Буллс” клублари сафида ўйнаган.