"Манчестер Юнайтед"нинг собиқ устози Алекс Фергюсон Криштиану Роналду билан муносабатлари ҳақида гапириб, инглиз клубида бирга ишлаган даврини ёдга олди.
Фергюсоннинг сўзларига кўра, 17 ёшидаёқ Роналдунинг ўзига хос даражадаги футболчи экани кўриниб турган. У португалияликнинг нафақат футболдаги сифатларини, балки доимий равишда яхшиланиб боришга интилишини ҳам қайд этди.
«Баъзан ажойиб ўйинчилар билан учрашиб қоласан. У 17 ёшга тўлганида, унда ўзига хос нимадир борлиги аллақачон аниқ эди - нафақат унинг маҳорати, балки энг яхши бўлиш истаги ҳам», - дея Фергюсоннинг сўзларини келтиради Press Box PR.
Криштиану 2003-2009 йилларда Фергюсон қўл остида "Манчестер Юнайтед" шарафини ҳимоя қилган. Айни пайтда ҳужумчи Саудия Арабистонининг "Ан-Наср" клубида ўйнамоқда.
