"Милан" бош мураббийи Массимилиано Аллегри жамоадаги дебютини нишонлаган ҳужумчи Никлас Фюллькругнинг ўйини ҳақида гапирди.
2 январь куни "россонерилар" "Вест Хэм"дан ижарага олинган 32 ёшли футболчини янги футболчи сифатида таништирди ва шу куни ҳужумчининг дебюти бўлиб ўтди. Германиялик футболчи А Серия доирасида "Кальяри"га қарши кечган ва кичик ҳисобдаги ғалаба билан якунланган ўйиннинг 69-дақиқасида захирадан майдонга тушди.
"Фюллькруг "Милан"да ўйнашни жуда хоҳлади ва унга имконият беришим тўғри бўлди. У ўзини кўрсатишга чанқоқ эканлигини дарҳол намоён қилди. Никлас яхши ўйнади, мен унга шубҳа қилмадим. Бугун у иккинчи қаватда фойдали бўлди, тўпни ҳимоячилардан зўр ҳимоя қилди. Биз учун бу янгилик эмас. У яхши мослаша олди," - деди Аллегри DAZN билан суҳбатда.
Ягона голга Рафаэль Леау муаллифлик қилди.
