«Андижон» янги мавсум учун таркибни яхшилаб шакллантириш жараёни давом эттирмоқда ва янги таклиф қилинаётган ижрочилардан ташқари ўтган йили ўйнаган футболчилардан шартномасини узайтираётганлари ҳам бор.

Жумладан, мухлисларнинг меҳрини қозонган ярим ҳимоячи Дониёр Абдуманнопов билан амалдаги келишув жорий йилги мавсум учун ҳам амал қилади ва томонлар бу борада бир тўхтамга келдилар.

Хабарингиз бор, Абдуманнопов асли Андижон фарзанди ва айнан «Андижон» клуби тарбияланувчиси саналади.

У 2018-2021 йиллар мобайнида жамоа шарафини ҳимоя қилган. 2025 йили эса яна клуб сафига қайтди. Дониёр ўтган йили 38 та учрашувда майдонга тушиб, 6 та гол урди ва 1 та ассистни бажарди.

Умумий ҳисобда эса Абдуманнопов «Андижон» либосида фаолияти давомида 72 та ўйинда майдонга тушган ва жами 10 та гол урган.