Мюнхеннинг "Бавария" клуби собиқ футболчиси Лотар Маттеус истеъдодли ярим ҳимоячи Леннарт Карлнинг "Реал"да ўйнаш истаги борлиги ҳақидаги сўзларига муносабат билдирди.
"Бу баландпарвоз гаплар ва катта мақсад. Карлнинг баёноти кўп шов-шувга сабаб бўлди. Менимча, бу 17 ёшли футболчи учун яхши. "Бавария"да абадий қоламан, дейиш шарт эмас. Инсоннинг орзуси бўлса, бу нормал ҳолат. Леннарт ўзининг шуҳратпараст ва ўз кучига ишонганлигини кўрсатди. У "Реал"нинг эътиборини тортиш учун Мюнхенда ўзини яхши кўрсатиши керак", - дея Маттеуснинг сўзларини келтиради Sky Sport.
Ярим ҳимоячининг шартномаси 2028 йилнинг ёзига қадар мўлжалланган. Карлнинг трансфер нархи 60 миллион еврони ташкил этади.
