Якшанба куни "Барселона" ва "Реал" Испания Суперкубоги финалида тўқнаш келади. Каталонияликлар бош мураббийи Ханс-Дитер Флик жамоада октябрь ойидаги мағлубият (1:2) учун "қаймоқранглилар"дан қасос олиш кайфияти борми, деган саволга жавоб берди.
"Менга қасос ҳақидаги гаплар ёқмаяпти. Бу бор-йўғи битта ўйин эди. Ундан кейинги учрашувларда биз керакли ишларни қилдик. Яна яхши ўйнай бошладик.
"Барселона" учун доим ғалаба қозониш муҳим. Мавсум охиригача узоқ йўл ва биз эртага дунёнинг энг яхши жамоаларидан бири билан ўйнаймиз," - деди Флик матбуот анжуманида.
"Барселона" - "Реал" учрашуви 11 январь куни Тошкент вақти билан соат 23:59да бошланади.
