Ўзбекистонда узоқ йиллар давомида фаолият юритиб келаётган россиялик скаут Николай Егоричев «Тобол» клубининг собиқ футболчиси Шаҳбоз Умаровнинг «Бунёдкор»га ўтганидан кейин миллий жамоага қайтиш эҳтимолини баҳолади, деб хабар беради Sports.kz ASnews.kz’га таяниб.

«Бунёдкор»га ўтиши билан Умаровнинг вазияти жиддий ўзгариб кетмайди. Ўзбекистон терма жамоасида вингер позициясида — ҳам ўнгда, ҳам чапда — танлов жуда катта. Умаров асосий даъвогарлар гуруҳига кирмайди. Қуйидаги футболчилар юқорироқ баҳоланади: Остон Ўрунов, Аббос Файзуллаев, Ҳожимат Эркинов, Русланбек Жиянов, Алишер Одилов, Жалолиддин Машарипов.

Бундан ташқари, "Бунёдкор" ҳозир Ўзбекистон чемпионати мезонлари бўйича топ-клуб ҳисобланмайди. Ўтган мавсумда жамоа турнир жадвалида бешинчи ўринни эгаллади. "Бунёдкор"дан терма жамоага футболчилар жуда кам чақирилади — бундай сўнгги мисол Одил Ҳамробеков бўлган, у кейинчалик Эроннинг "Трактор" клубига ўтган. Асосан терма жамоага чет элда тўп сураётган футболчилар ёки мамлакатнинг етакчи клублари — "Пахтакор", "Насаф" ва "Нефтчи" вакиллари чақирилади. Ўтган мавсум якунида ҳам айнан шу уч клуб биринчи уч ўринни эгаллаган», — деди Егоричев.

Мутахассис, шунингдек, терма жамоанинг янги бош мураббийи омилини ҳам таъкидлади.

«Шуни ҳам инобатга олиш керакки, Умаров анча вақтдан бери терма жамоага чақирилмаган, ҳозирги бош мураббий — Фабио Каннаваро. Шаҳбозни эса у деярли билмайди. У сўнгги бор икки йил аввал, Осиё Кубогига, аввалги бош мураббий Сречко Катанац даврида чақирилган эди. Каннаваронинг узоқ вақт терма жамоада ўйнамаган футболчини тўғридан-тўғри жаҳон чемпионатига ёки ҳатто тайёргарлик жараёнига чақириши эҳтимоли жуда паст.

Шаҳбоз Умаровнинг жаҳон чемпионатига бориш имконияти барибир бор, аммо бунинг учун у 2026 йил мавсумининг биринчи қисмини жуда ишончли ва самарали ўтказиши шарт. Бироқ натижадорликнинг ўзи ҳам чақирув кафолати эмас. Ёрқин мисол — ОКМКда ўйнаган, ҳозир эса "Нефтчи"га ўтган вингер Хуршид Ғиёсов. У ўтган мавсум барча мусобақаларда 34 ўйинда 12+11 (гол+пас) кўрсаткич қайд этган, чемпионатнинг энг самарали футболчиларидан бири бўлган, аммо барибир терма жамоага чақирилмаган», — дея сўзини якунлади Егоричев.

Эслатиб ўтамиз, 26 ёшли Умаров мунтазам ўйин амалиётига эга бўлиш ва жаҳон чемпионати олдидан форма тўплаш мақсадида Қозоғистон премьер-лигасини тарк этиб, Ватанга қайтди. 2025 йил мавсумининг биринчи ярмини у «Турон» сафида ўтказиб, 10 ўйинда 1 гол ва 3 ассист қайд этган, шундан кейин эса Қўстанайнинг «Тобол» клуби асосий таркибида мустаҳкам жой эгалламади.

Қозоғистондаги энг муваффақиятли даврини Шаҳбоз «Ордабаси» таркибида (2022–2024) ўтказиб, жамоа билан мамлакат чемпионига айланган. Футболчи Ўзбекистон терма жамоаси сафида 5 та ўйинда иштирок этган. Терма жамоа ўз тарихида илк бор жаҳон чемпионатига йўлланма олган. Турнир жорий йил ёзида АҚШ, Канада ва Мексикада бўлиб ўтади.