Мюнхеннинг "Бавария" клуби қанот ҳужумчиси Майкл Олисе Германия чемпионатининг 16-туридан ўрин олган "Вольфсбург"га қарши ўйинда (8:1) голли узатмани амалга оширди. Шу тариқа, франциялик футболчи Германия Бундеслигасининг дастлабки 50 учрашувида ассистлар сони бўйича рекорд ўрнатди.
Олисе Германия чемпионатининг 50 ўйинида 24 та голли узатмани амалга оширди. Бундай статистика 2004/2005 йилги мавсумдан бери ҳеч бир футболчида йўқ.
Жорий мавсумда вингер барча мусобақаларда 25 та ўйин ўтказиб, 11 та гол ва 13 та голли узатмани амалга оширди. 23 ёшли футболчи "Бавария" сафига 2024 йилнинг ёзида "Кристал Пэлас"дан келиб қўшилганди. Мюнхен клубидаги дебют мавсумида у 55 та ўйинда майдонга тушиб, 20 та гол урди ва 23 та голли узатмани амалга оширди.
