"Манчестер Сити" ярим ҳимоячиси Фил Фоден Антуан Семеньонинг жамоани қандай кучлироқ қила олиши ҳақида сўзлади.
"Шаҳарликлар" 26 ёшли қанот ҳужумчисини "Борнмут"дан 72 миллион еврога сотиб олишди. Хосеп Гвардиола жамоасидаги дастлабки икки ўйинда ганалик футболчи иккита гол урди ва бир гол узатмасини берди.
"Семеньо ҳимоячилар ортига югуриш усулини афзал кўради - менимча, бизда бундай услубдаги ўйинчилар кам. Унинг ҳаракати паст мудофаа билан ўйнайдиган рақибларга қарши жуда катта фойда келтириши мумкин. У дарвозага доимий хавф солади, ҳар доим керакли жойда бўлади. Унинг жисмоний кучи, тўпни эгаллаб туриш маҳорати, иккала оёғини ҳам яхши ишлатишини алоҳида таъкидлаш лозим. Жуда яхши футболчи, ҳатто ўз хусусиятлари бўйича "Манчестер Сити" учун бироз ғайриоддий, аммо у бизга ҳақиқатан ҳам зарур," - деди Фоден "Men in Blazers" билан суҳбатда.
