Испания терма жамоаси мураббийлар штаби "Барселона" ва "Реал" ўртасидаги зиддиятдан хавотирда. Бу ҳақда AS нашри хабар берди.
Манбага кўра, терма жамоадагилар ҳозирча вазият жамоаларни Жозе Моуриньо ва Хосеп Гвардиола бошқарган пайтдаги каби келишмовчилик даражасига етиб бормаганини тушунишади. Бироқ, баъзи асосий футболчилар, хусусан, Ламин Ямал ва Даниэль Карвахал ўртасида юзага келган кескинлик "Қизил фурия" бош мураббийи Луис де ла Фуэнте ва унинг штабида хавотир уйғотди. Мутахассислар бундай ҳолат терма жамоанинг 2026 йилги жаҳон чемпионатидаги иштирокига таъсир кўрсатиши мумкинлигини англамоқда.
Таъкидланишича, ўтган Испания Суперкубоги октябрь ойида бўлиб ўтган "эл-класико" атрофидаги воқеаларни унутишга ёрдам бериши мумкин эди, бироқ бундай бўлмади. Хусусан, Ямал ва "Реал" ҳимоячиси Дин Хёйсен ўртасида жанжал келиб чиқди.
Эслатиб ўтамиз, октябрь ойида Ямал "Порсинос" медиа жамоасини "Реал" билан таққослаб, улар фирибгарлик қилаётгани ва шикоят қилаётганини айтганди.
