"Барселона" ярим ҳимоячиси Марк Берналь каталонияликлар сафида қолади.

Аввалроқ 18 ёшли футболчини мунтазам ўйин амалиётига эга бўлиши учун ижарага бериш мумкинлиги ҳақида хабарлар тарқалган эди.

Marca маълумотларига кўра, "Жирона" ҳали ҳам келишувга қизиқиш билдирмоқда, бироқ унинг амалга ошиш эҳтимоли юқори эмас. Сабаби, Ханси Флик футболчидан воз кечишни истамаяпти, айниқса Дро Фернандес жамоани тарк этганидан сўнг.

Қайд этилишича, бош мураббий мавсум охиригача жамоа таркибини сақлаб қолиш ниятида. Фақат дарвозабон Марк-Андре тер Штеген бундан мустасно, у ижарага кетишга яқин.

Берналь трансферига Гавининг қайтиши таъсир қилиши мумкин эди, аммо клуб ярим ҳимоячини жароҳатдан кейин аста-секин жамоага қайтариш ниятида.

Шу боис, яқин ойларда Берналь жамоа учун керак бўлиши кутилмоқда. Ўзи эса ўйин вақти ортиб бораётганини кўриб, кетишни тезлаштириш ниятида эмас.