Жорий йилнинг 16 – 24 август кунлари Хитойнинг Нанкин шаҳрида ўсмирлар ўртасида ўтказиладиган II Осиё ўйинларида оғир атлетика бўйича Ўзбекистон ўсмирлар терма жамоаси аъзоси Шахзод Худойберганов очилиш тантаналарида Давлатимиз байроғини стадион узра олиб ўтади.

Қитъа миқёсида ўтказиладиган мазкур спорт байрамида жами 64 нафар спортчимиз, спортнинг 10 тури бўйича бўлиб ўтадиган мусобақаларда Ватанимиз шарафини ҳимоя қиладилар.

Спорт делегациялари истиқомат қиладиган шаҳарчада Ўзбекистон байроғини кўтарилишига бағишланган тадбир 15 – август куни маҳаллий вақт билан соат 10:30 да (Тошкент вақти билан соат 07:30да) бошланади.

Ўзбекистон делегациясининг биринчи қисми (дзюдо, теннис, баскетбол, оғир атлетика, стол тенниси бўйича терма жамоа аъзолари) 12 – август куни Тошкент вақти билан соат 21:35да Хитой давлатига жўнаб кетади. Делегациямизнинг қолган аъзолари (сузиш, ўқ отиш, енгил атлетика, қиличбозлик, таэквондо WTF бўйича терма жамоа аъзолари) эса 16 август куни Нанкин шаҳрига йўл оладилар.

Биринчи бўлиб мусобақаларга 17 – август куни теннис, баскетбол, дзюдо, стол тенниси ва оғир атлетикачиларимиз киришадилар. Шу куни дзюдо бўйича икки вазн тоифасида, оғир атлетика бўйича эса уч вазн тоифасида медаллар ўйналади.

Маълумот учун: 2009 йили Сингапурда бўлиб ўтган ўсмирлар ўртасидаги биринчи Осиё ўйинларида 31 нафар ўсмирларимиз спортнинг 7 турида ғолиблик учун кураш олиб боришган ва улардан уч нафари, булар – Юлдуз Қўчқорова (сузиш, 100 м. чалқанча усулда), Руслан Қурбонов (енгил атлетика, уч хатлаб сакраш) ва Светлана Прошкина (енгил атлетика, баландликка сакраш) бронза медалига сазовор бўлишган.