Ярим ҳимоячи Бернарду Силва агенти Жорже Мендеш орқали "Барселона"га ёзда клубга ўтишга тайёрлигини маълум қилди. Бу ҳақда якшанба куни Испаниянинг Sport нашри хабар берди.
Сўнгги йилларда Бернардуни бир неча бор "Барселона" билан боғлашди, аммо турли сабабларга кўра келишув амалга ошмади.
Ёзда "Барселона" Бернарду Силвани эркин агент сифатида ўз сафига қўшиб олиши мумкин. Шу билан бирга, Каталония клуби 31 ёшли португалиялик футболчига таклиф билан чиқиши факт эмас. "Кўк-анорранглилар" Силванинг даражасига шубҳа қилмаяпти, аммо уларда ҳозир майдон марказида муаммо йўқ.
"Барселона"нинг ғояси ўз истеъдодларига таяниш ва таркибда борларини сақлаб қолишдир," - дейилади материалда.
Аммо ярим ҳимоячилардан бирортаси кетса, "Барселона" Бернарду Силвани ўз сафига қўшиб олиши мумкин. Португалиялик "Манчестер Сити"да 2017 йилнинг ёзидан буён тўп суриб келмоқда.
