Теннис бўйича “Катта дубулға” турнирларининг 24 карра ғолиби Новак Жокович Австралия очиқ чемпионатининг чорак финалида италиялик Лоренцо Мусеттига қарши баҳс олиб борди ва ярим финалга йўл олди. Мусобақа Мелбурн шаҳрида бўлиб ўтмоқда.
Учрашувнинг дастлабки икки сетида Мусетти 6:4, 6:3 ҳисобида устун келди. Учинчи сетда Жокович 3:1 ҳисобида ғалаба қозонаётган вақтда италиялик теннисчи жароҳат сабабли баҳсни давом эттира олмаслигини маълум қилди. Шу сабабли Новак Жокович ярим финалга йўл олди.
Чорак финалнинг сўнги учрашувида турнирнинг амалдаги ғолиби — италиялик Янник Синнер америкалик Бен Шелтонга қарши кортга чиқди ва 6:3, 6:4, 6:4 ҳисобида устун келди. Новак Жокович ва Янник Синнер ўртасидаги учрашув 30 январь куни Мелбурн шаҳридаги “Род Лейвер” аренасида бўлиб ўтади.
Шу тариқа, ATP рейтингида дастлабки 4 ўринни банд этган теннисчилар 2026-йилнинг илк “Катта дубулға” турнирида ярим финалга етиб келди.
Ярим финал жуфтликлари:
Карлос Алкарас (Испания, 1) — Александр Зверев (Германия, 3)
Янник Синнер (Италия, 2) — Новак Жокович (Сербия, 4)
Маълумот учун, Жокович Австралия очиқ чемпионатларининг 10 карра ғолиби, Янник Синнер эса амалдаги чемпион, Александр Зверев 2025 йилги турнирнинг финалчиси, Карлос Алкарас эса ATP рейтинги етакчиси ҳисобланади.
Australian Open мавсумдаги илк “Катта дубулға” турнири бўлиб, қаттиқ қопламали кортларда ўтказилади. Мусобақа 1 февраль куни якунланади. Чемпионатнинг умумий мукофот жамғармаси 75 миллион АҚШ долларини ташкил этади; ғолиб теннисчи эса 2,770 миллион АҚШ доллари ва 2000 рейтинг очкоси билан тақдирланади.
