Чемпионлар лигаси жорий мавсумининг умумий босқичи ўз ниҳоясига етди. Чоршанба куни сўнгги тур ўйинлари бўлиб ўтди, унинг натижаларига кўра плей-оффнинг барча иштирокчилари ва 1/8 финалга тўғридан-тўғри йўлланма соҳиблари аниқланди.
WhoScored статистик портали рейтингига кўра, умумий босқич якунлари бўйича энг яхши ўйинчилар рейтингини Килиан Мбаппе бошқарди. "Реал" форварди еттита учрашувда 13 та гол уриб, тўпурарлар пойгасида яққол пешқадамлик қилмоқда. Ўртача рейтингда иккинчи ўринни "Барселона" вакили Ламин Ямал эгаллаган бўлса, кучли учликни "Бавария" вакили Харри Кейн якунлаб берди. Кейинги бешликда "Ливерпуль" футболчиси Доминик Собослаи ва Мадриднинг "Атлетико" клубидан Хулиан Альварес бормоқда.
Шунингдек, Габриэль Мартинелли, Майкл Олисе, Виктор Осимхен, Алехандро Гримальдо ва Хвича Кварацхелия мос равишда 6-10-ўринларни эгаллади.
