Қанот ҳужумчиси Макс Доумен Лондоннинг «Арсенал» клуби билан дастлабки шартнома имзолади. Аввалроқ вингер Чемпионлар лигаси тарихидаги энг ёш футболчига айланган эди.

«Макс Доумен клуб билан дастлабки шартнома имзолаганини мамнуният билан эълон қиламиз. Бу шартнома унга декабрь ойида 17 ёшга тўлганидан сўнг профессионал келишув тузиш имконини беради. Макс саккиз ёшида академиямизга қўшилган ва “Хейл Энд” орқали ўсиш жараёнида ёшлар даражасида тезда турли рекордларни янгилай бошлади. У 13 ёшида U-18 жамоаси сафида дебют қилди ва 14 ёшида УЕФА Ёшлар лигаси тарихидаги энг ёш гол муаллифига айланди. Макс ҳам ҳужумкор ярим ҳимоячи, ҳам қанотда бирдек самарали ўйнайди. Унинг техникаси, майдонни кўра билиши ва универсаллиги уни Англиянинг энг умидли ёш иқтидорларидан бирига айлантиради.

Ёзда Макс клуб стипендиатига айланади. Айни пайтгача у академиямиз жамоалари сафида U-18 ва U-21 даражасида 34 та учрашувда 27 та гол уриб, 10 та голли узатма амалга оширди», — дея хабар беради «Арсенал» расмий сайти.

Жорий мавсумда Доумен «тўпчилар» асосий жамоаси сафида барча мусобақаларда бешта учрашувда майдонга тушди.