Мадриднинг «Реал» клуби ва Германия терма жамоасининг машҳур собиқ футболчиси Тони Кроос «Интер»ни жорий мавсумда Чемпионлар лигасида ғолиб бўлмаслигини айтди.

«Нерадзуррилар» умумий босқични 10-ўринда якунлаб, Чемпионлар лигасида тўғридан-тўғри 1/8 финалга чиқа олмади. Ўтиш босқичида Кристиан Киву шогирдлари Норвегиянинг «Будё-Глимт» жамоасига қарши баҳс олиб боради.

«Интер» 1/8 финалга чиқади, аммо бу мавсум Чемпионлар лигасини юта олмайди», — дея Крооснинг сўзларини келтиради Италия ОАВлари.

«Интер» ва «Будё-Глимт» ўртасидаги учрашувлар 18 ва 24 февраль кунлари бўлиб ўтади. Ўтган мавсумда Серия А гранди финалгача етиб бориб, у ерда «ПСЖ»га йирик ҳисобда мағлуб бўлган (0:5).