Нидерландиянинг Вейк-ан-Зее шаҳрида шахмат бўйича 2026-йилги Tata Steel Chess турнири эртага якунига етади. Бугун шахматчилар 12-тур баҳсларини ўтказишди.

Чемпионатнинг Masters гуруҳида иштирок этаётган Жавоҳир Синдоров кеча Аржун Эригаиси (Ҳиндистон) устидан муҳим ғалабага эришиб, пешқадамга айланганди. Ҳамюртимиз 12-турда ҳиндистонлик Рамешбабу Праггнанандҳага қарши ўйинда тезкор дуранг қайд этди: 14-юришга келиб томонлар бир юришни 3 марта такрорлашди.

Нодирбек Абдусатторов эса бугун германиялик Маттеус Блюбаумга қарши баҳсда муҳим ғалабани қўлга киритди. Партиянинг 30-юришигача компьютер вазиятни тенг дея баҳолаётган бўлса-да, ватандошимиз рақибга босим ўтказаётган эди. Натижада рақиб 31-юришда қўпол хатога йўл қўйди. Нодирбек Маттеуснинг хатосидан ўта унумли фойдаланиб, катта устунликни қўлга киритди. Абдусатторов битта сипоҳ устунлигини қўлга киритгач, Блюбаум таслим бўлди.

Нодирбек Абдусаттторов бугунги ғалаба эвазига ўз очколарини 8 тага етказиб, яққол пешқадамга айланди. Синдаров ҳисобида эса 7,5 очко мавжуд. Икки шахматчи ҳисобида 7 тадан очко бор.

Абдусатторов эртага 13-тур доирасида Аржун Эригаисига қарши қора доналарда ўйнайди. Жавоҳир Синдаров эса турнир аутсайдери Нгуен Тай Дай Ван (Чехия)га қарши қора доналарда баҳс юритади.