Саудиянинг «Ал-Ҳилол» клуби ижтимоий тармоқларда франциялик ҳужумчи Карим Бенземанинг янги жамоа рамзлари билан тушган илк суратларини эълон қилди. Бир кун олдин у «Ал-Иттиҳод»дан «Ал-Ҳилол»га кўчиб ўтган эди.

Аввалроқ ОАВ Бензема «Ал-Иттиҳод» таклиф қилган янги шартномани рад этганини ёзган. Француз футболчиси Саудия Арабистони чемпионатида 2023 йил ёзидан бери тўп суриб келаётган эди. Жорий мавсумда у барча мусобақаларда 21 та ўйинда қатнашиб, 16 та гол урди.

Шунингдек, миш-мишларга кўра, Бенземанинг «Ал-Иттиҳод»дан «Ал-Ҳилол»га ўтишига «Ан-Наср» форварди Криштиану Роналду қарши чиққан. Эслатиб ўтамиз, Саудия Арабистони Давлат инвестиция жамғармаси «Ан-Наср», «Ал-Иттиҳод», «Ал-Ҳилол» ва «Ал-Аҳли» клубларига эгалик қилади.