"Бавария" марказий ҳимоячиси Дайо Упамекано катта эҳтимол билан клубда қолади. Бир қатор нуфузли манбалар хабар беришича, 27 ёшли футболчи узоқ давом этган музокаралардан сўнг мюнхенликлар билан шартномани узайтиришга рози бўлган.

Франциялик ҳимоячига Мадриднинг "Реал" клуби каби Европа грандлари қизиқиш билдираётгани ҳақида хабарлар тарқалган эди. Бироқ инсайдер Фабрицио Романонинг таъкидлашича, Упамекано "қироллик клуби"дан аниқ таклиф олмаган — расмий музокаралар олиб борилмаган. "Қаймоқранглилар" шунчаки футболчи билан шартнома имзолаш имкониятларини ўрганиб чиқишган, холос.

Дайо Упамеканонинг "Бавария" билан амалдаги шартномаси шу ёзда якунига етади. Агар кутилмаган ҳолат юз бермаса, яқин вақт ичида келишув узайтирилгани расман эълон қилинади.