"Барселона" президенти Жоан Лапорта реконструкция қилинаётган "Камп Ноу" стадионининг келажаги ҳақида катта ишонч билан гапирди. Стадионни қайта қуриш ишлари 2023 йилда бошланган бўлиб, ҳали тўлиқ якунланмаган бўлса-да, ўтган йилнинг ноябрь ойидан буён унда ўйинлар ўтказилмоқда.
"Биз чексиз фахр туйғусини ҳис қиляпмиз. Бу Европадаги энг яхши стадион бўлади. Энг йириги — қарийб 105 минг ўриндиқли, қулай, хавфсиз ва тижорий жиҳатдан жозибадор масканга айланади.
Биз унда йирик финаллар ўтказилишини истаймиз. 2029 йилги Чемпионлар лигаси финали қуриб битказилган ва ҳақиқий совғага айланган "Камп Ноу"да ўтишини жуда хоҳлардик. Шунингдек, 2030 йилги Жаҳон чемпионати финалини айнан шу ерда ўтказиш ажойиб бўларди. Ўз уйимизга тўлиқ қайтганимизда, бу дунёдаги энг яхши стадион бўлади", — деди Лапорта.
