"Интер" мухлислари жамоанинг кейинги учта сафар ўйинига чипта сотиб олиш ҳуқуқидан маҳрум этилди. Бу ҳақда La Gazzetta dello Sport нашри хабар бермоқда.
Клуб ушбу жазога мухлислардан бири "Кремонезе" дарвозабони Эмиль Аудерога қарата петарда отгани учун лойиқ кўрилди. Бахтли тасодиф туфайли посбон жиддий жароҳат олмади ва ўйинни давом эттира олди.
23 мартгача амал қилувчи ушбу тақиқ "Сассуоло", "Лечче" ва "Фиорентина"га қарши баҳсларга тааллуқлидир. Бироқ, 8 март куни "Сан-Сиро"да бўлиб ўтадиган "Милан"га қарши дербига бу чеклов таъсир қилмайди (гарчи бу ўйинда "Интер" меҳмон мақомида бўлса ҳам).
Ҳозирда Кристиан Киву шогирдлари 23 ўйиндан сўнг 55 очко билан турнир жадвалида пешқадамлик қилмоқда. "Милан" 50 очко, "Наполи" эса 46 очко жамғарган.
