«Рома»нинг тирик афсонаси Франческо Тотти яна қадрдон жамоасига қайтиши мумкин. Бу ҳақда клуб раҳбарлик лавозимида ишлаётган Клаудио Раньери Sky Italia телеканалига берган интервьюсида маълум қилди.
Тригориядаги қароргоҳда берилган интервьюда функционер клуб хўжайинлари — Фридкинлар оиласи бу масалани жиддий кўриб чиқаётганини таъкидлади.
«Биламан, Фридкинлар бу ҳақда ўйлашмоқда. Бунга умид қиламан. Франческо «Рома»га чиндан ҳам фойда келтира олади, чунки у — ушбу клубнинг ажралмас бўлагидир», — дейди Раньери.
Эслатиб ўтамиз, «Император» 2017 йилда футболчилик фаолиятини якунлагач, дарҳол клуб директори сифатида иш бошлаган эди. Бироқ 2019 йилда раҳбарият билан юзага келган келишмовчиликлар ва стратегик қарорлар қабул қилишда унинг роли чеклангани сабабли ўз лавозимини тарк этганди.
