"Барселона" бош мураббийи Ханс-Дитер Флик Деку билан ҳамкорлик ҳақида фикр билдирди. Португалиялик мутахассис Каталония клубида спорт директори лавозимида фаолият юритади.
"Мен Деку билан ишлашдан жуда мамнунман. Орамизда ишонч бор. Биз бир хил футболчиларни қидирамиз ва бир хил фалсафага амал қиламиз. Бизга хотиржам ишлаш учун имконият беришмоқда. Илгари менда ҳеч қачон бундай бўлмаган ва мен буни жуда қадрлайман", — деди Флик жума кунги матбуот анжуманида.
"Барселона" Испания чемпионатида пешқадамлик қилмоқда ва иккинчи ўриндаги "Реал"ни бир очкога ортда қолдирмоқда. Каталонияликлар айни дамда Ла Лига доирасидаги "Мальорка"га қарши кечадиган ўз уйидаги ўйинга тайёргарлик кўришмоқда. Баҳс 7 февраль куни Тошкент вақти билан 20:15 да бошланади.
