"Бавария"нинг инглиз ҳужумчиси Харри Кейн Саудия Арабистони клубларининг қизиқиш доирасига тушди. Бу ҳақда "Kicker" нашри хабар бермоқда.

Манбанинг берган маълумотларига кўра, футболчининг эҳтимолий иш берувчилари орасида қиролликнинг етакчи жамоалари, жумладан, "Ал-Аҳли" ва "Ал-Иттиҳод" бор. Таъкидланишича, Германия клуби раҳбарияти ҳужумчини ўз таркибида сақлаб қолиш ниятида, бироқ шартномада кўрсатилган 70 миллион евро миқдоридаги товон пули банди мавжуд. Ушбу банд кучга киришидан олдин футболчи жамоани тарк этиш истаги ҳақида раҳбариятни расман хабардор қилиш ҳуқуқига эга.

Жорий мавсумда Кейн "Бавария" сафида барча турнирларда 35 та ўйинда майдонга тушиб, 38 та гол уришга муваффақ бўлди. Инглиз футболчисининг мюнхенликлар билан амалдаги шартномаси 2027 йилнинг ёзига қадар мўлжалланган. "Transfermarkt" портали маълумотларига кўра, футболчининг тахминий қиймати 65 миллион еврони ташкил этади.