«Манчестер Сити» клуби бош мураббийлик лавозими учун номзодларни кўриб чиқмоқда. Жамоанинг амалдаги устози Хосеп Гвардиола инглиз клубини тарк этиши мумкин. Бу ҳақда машҳур футбол инсайдери Фабрицио Романо маълум қилди.
«Бу номзод ҳали ҳам Энцо Мареска бўлиб қолмоқда. Ушбу мутахассис ҳозир эркин агент мақомида (у 2026 йилнинг 1 январида «Челси»ни тарк этган). "Шаҳарликлар" унга анчадан бери қизиқиш билдириб келишмоқда, Гвардиоланинг ўзи эса унинг истеъдоди мухлиси ҳисобланади. Энцо аввал ҳам клубда ишлаган (Гвардиоланинг ёрдамчиси сифатида), АПЛда тажрибага эга ва совринлар (жумладан, «Челси» билан Конференциялар лигаси ва Клублар ўртасидаги ЖЧ) қўлга киритган. «Сити» унинг имкониятлари билан жуда яхши таниш», — деди инсайдер ўзининг YouTube-каналида.
Ҳозирда «Манчестер Сити» Премьер-лига турнир жадвалида иккинчи ўринда бормоқда ва пешқадам «Арсенал»дан олти очко ортда қолмоқда.
