Мадриднинг «Реал» клуби марказий ҳимоячиси Давид Алаба жамоадаги ҳолатидан норози. 33 ёшли футболчи ўзини ўйнашга тайёр деб ҳисоблайди ва Альваро Арбелоа қўл остида доимий ўйин амалиёти йўқлигидан жуда ғазабда, деб хабар бермоқда «Marca». Австриялик футболчи мураббий нега унга ишонмаётганини тушунмаяпти ва бу ҳақда унинг ўзига тўғридан-тўғри маълум қилган.
Арбелоа тайинланганидан бери Давид Алаба майдонда тўрт марта кўриниш берди, бироқ барча ҳолатларда ўйин якунланиши арафасида захирадан майдонга тушган. Эслатиб ўтамиз, испаниялик мутахассис ўтган ойнинг ўрталарида ишдан бўшатилган Хаби Алонсонинг ўрнини эгаллаб, бош мураббий лавозимига тайинланган эди.
Алабанинг «Реал» билан шартномаси мавсум якунида ниҳоясига етади ва унинг узайтирилиши даргумон.
